الثلاثاء، 5 يوليو، 2011

رسائل

قبل يوم 8/7 حبيت اقول شوية رسائل لعدة جهات وياريت تستحملونى فيها
اول رساله للمجلس العسكرى شكرا يامجلس ع اللى قدمته للثوره وعاوزينك ترجع لمكانك الطبيعى 
التانيه لعصام شرف اقدر اقولك انك ف ازمه اما تختار انك تنزل الجمعه8/7 او تخليك زى مانت كلنا عارفين نزاهتك بس الضغوط اللى عليك هتقدر تشيلها خالص لو انضميت مره اخرى للشعب وهنرجعك مكانك لما تنجح الثوره ونكمل المسيره
الرساله التالته للشعب ياشعب مصر انت قمت بثوره العالم كله شهدلها بالنظام قلما تلاقى ثوره زى ثورتك بس للاسف ثورتك بتتفرغ داخليا وبتتسرق هترضى تسيب حاجه كنت بتقدم روحك فيها 
الرساله الرابعه لحزب الكنبه يعنى اللى قاعدين ف البيت ومش بينزلوا جايز عشان وراهم مصالح او خايفين ع البلد بسبب فزاعات الاستقرار هقولك نصيحه واحده بس فاكر ايام الثوره الاعلام كان بيعمل ايه وقلت لنفسك فعلا اللى ف الميدان دول كذا وكذا وكذا وبعد الثوره عرفت ان الاعلام فاسد فهمتنى عاوز اقولك ايه ابعد عن الاعلام ده ........... طب اعمل ايه ياترى؟؟؟ لو عاوز تشوف الصوره واضحه من غير اى تشويه انزل وشوف بنفسك يوم الجمعه عجبك الحوار كمل معاهم لقيتهم شوية بلطجيه غادر الميدان باقصى سرعه وارجع اتفرج ع الاعلام ماشى الكلام
الرساله الخامسه لاسر الشهداء الجمعه دى جمعة القصاص الشهداء اولا الثوره اولا يعنى حق اولادكم واولادنا مش هيضيع 
الرساله السادسه للى بيتكلموا باسم الدين سواء بقى جماعات او ائتلافات المهم بلاش والنبى تطلعوا فتاوى وتقولوا ان الديه تنفع لاسر الشهدا مين قال كده ياحبيبى اسمع انت كده بتعمل حاجتين بتبيع دم الشهيد وبتدلع المجلس العسكرى وبخصوص الديه اسمع بقى ده كلام منقول عن فقيهه ف الازهر بتقول ان الديه متنفعش للى مقتول قتل عمد يعنى القصاص هوه الحل الوحيد اما القتل الخطا هوه اللى ينفع فيه الديه وف القتل العمد تنفع الديه ف حاله واحده بس اذا رضى اهل الشهدا هل انت شايفهم راضيين ؟؟؟؟؟؟؟؟؟؟
تانى حاجه لو لو لو وده مستحيل مليون المليون انهم رضوا مين قالك انى انا هرضى 
هتقولى وانت مالك؟
هقولك اللى مات ده دفع دمه وحياته عشان اكون ف حريه
اللى مات ده اخويه
فهمت يعنى استحاله هنسيب حقك ياشهيد
الرساله السابعه والاخيره للى نازلين وهينضموا ارجو عدم المجى بشعارات هتيجى اما معاك علم مصر او تعالى كده من غير اى حاجه
وعاوزينها سلميه ولا داعى للعنف واى حد هيعمل عنف يبقى مش مننا ده مدسوس عاوز يبوظ الثوره عاوزينها يبقى ف شكل محترم زى ماحنا ماشيين ع الخط وهنعتصم لحد ماترجع حقوقنا كامله وتجيب معاك زجاجة مياه للشرب وتلبس كوتشى لسرعة الحركه وسهولتها واى تعليمات تسمعها من اللى فاهمين تتبعها
وف الاخر اسال الله ان يوفقنا ويحقق اهدافنا انه هوه القادر ع كل شى
والسلام عليكم ورحمة الله وبركاته

هناك تعليقان (2):

غير معرف يقول...

جميل جدا هو ده الكلام الصحيح وغير كدة يبقى سلبية وخيانة كلمتوالى يوم الزحف

عاشق الحضاره المصريه يقول...

مشكور مرورك الجميل
تحياتى